پی ایس بی کوچنگ سنٹر کی سہولت کا انتظام سنبھالنا اچھا اقدام ہے، سید عاقل شاہ
پشاور (سپورٹس رپورٹر) ڈائریکٹوریٹ جنرل سپورٹس خیبر پختونخوا نے پاکستان سپورٹس بورڈ کوچنگ سنٹر پشاور کا انتظام سنبھال لیا، پی ایس بی کوچنگ سنٹر وفاقی حکومت کے پاکستان سپورٹس بورڈ کے زیر انتظام تھا، پی ایس بی کوچنگ سنٹر ڈائریکٹوریٹ جنرل سپورٹس کے احاطے میں واقع ہے جو صوبائی حکومت کی ملکیت ہے۔ سابق صوبائی وزیر کھیل سید عاقل شاہ نے ڈائریکٹوریٹ جنرل سپورٹس کی جانب سے پی ایس بی کوچنگ سنٹر کا انتظام لینے کا خیر مقدم کرتے ہوئے ڈائریکٹر جنرل سپورٹس تاشفین حیدر کو خراج تحسین پیش کیا ہے۔ ایک بیان میں سید عاقل شاہ نے کہا کہ پی ایس بی کوچنگ سنٹر کی سہولت کا انتظام سنبھالنا اچھا اقدام ہے وہ خود اس سلسلے میں کئی سالوں سے کوشش کر رہے تھے کہ صوبائی حکومت اس سہولت کا انتظام سنبھالے، سابق ڈائریکٹرز جنرل سپورٹس سے کئی بار بات کی تھی کہ یہ صوبے کی سہولت ہے اس کا انتظام سنبھالا جائے لیکن کسی نے انتظام نہیں سنبھالا۔انہوںنے کہا کہ یہ کھیلوں کے لئے بہت بڑا کام ہوا ہے پہلے اپنی ہی سہولت میں کھیلوں کے انعقادکے لئے دوسروں سے پوچھنا پڑتا تھا اب صوبے خصوصاً پشاور کے کھلاڑیوں کو کھیلنے کی مزید سہولیات میسر آئی ہیں۔
About the Author
