پشاور زلمی اور زلمی فاؤنڈیشن کا یو فون 4G، یو این ویمن اور حکومتِ خیبر پختونخوا کے اشتراک سے زلمی ویمن لیگ سیزن ٹو پشاورمیں شروع
پشاور: زلمی ویمن کرکٹ لیگ سیزن ون کی شاندار کامیابی کے بعد سیزن ٹو کا پشاور میں آغاز ہوگیا۔ ٹورنامنٹ کی افتتاحی تقریب میں سیکرٹری ایجوکیشن خیبر پختونخواہ کیپٹن ریٹائرڈ کامران آفریدی اور پشاور زلمی اسٹار محمد حارث شریک ہوئے۔ حیات آباد
اسپورٹس کمپلیکس پشاور میں کھیلے جانیوالی زلمی ویمن کرکٹ لیگ سیزن ٹو کے پہلے روز تین میچز کھیلے گئے۔
پہلے میچ میں ڈی آئی خان نے کوہاٹ کو آٹھ وکٹوں سے شکست دی۔ کوہاٹ نے آٹھ اوورز میں پانچ وکٹوں پر پینتیس رنز بنائے۔ جواب میں ڈی آئی خان نے ہدف دو وکٹوں پر حاصل کرلیا۔دوسرے میچ میں بنوں نے مردان کو آٹھ وکٹوں سے ہرادیا۔مردان نے پہلے بیٹنگ کرتے ہوئے آٹھ اوورز میں دو وکٹوں پر پچانوے رنز بنائے۔ جواب میں بنوں نے ہدف دو وکٹوں پر حاصل کیا۔ تیسرے میچ میں پشاور نے مالاکنڈ کو آٹھ رنز سے ہرادیا۔پشاور نے آٹھ اوورز میں پانچ وکٹوں پر انسٹھ رنز بنائے۔
جواب میں مالاکنڈ کی ٹیم دو وکٹوں پر اکیاون رنز بناسکی۔جمعے کو ہونیوالے میچز میں بنوں کا مقابلہ ہزارہ، پشاور کا مقابلہ کوہاٹ اور پشاور آل اسٹارز کا مقابلہ مردان سے ہو گا۔ سیمی فائنلز اور فائنل یکم دسمبر کو کھیلے جائیں گے۔ اس سال کا ایڈیشن ”خواب سے حقیقت تک” کے وژن کو مزید مضبوط کرتے ہوئے خواتین کرکٹ کے فروغ کے لیے ایک اہم سنگِ میل ثابت ہوگا۔
سیزن 2 کے انعقاد میں یو فون 4G، یو این ویمن، حکومتِ خیبر پختونخوا، ہائر ایجوکیشن ڈیپارٹمنٹ خیبر پختونخوا اور ڈی جی اسپورٹس خیبر پختونخوا بھرپور تعاون کر رہے ہیں۔ یہ اشتراک خواتین کو بااختیار بنانے، مساوی مواقع فراہم کرنے اور نوجوان کھلاڑیوں کو پیشہ ورانہ کھیلوں میں آگے بڑھنے کے مواقع دینے کے مشترکہ عزم کی عکاسی کرتا ہے۔ سیزن 1 کی کامیاب میزبانی نے زلمی ویمن لیگ کو خیبر پختونخوا کی پہلی باقاعدہ خواتین کرکٹ لیگ کے طور پر قومی سطح پر متعارف کرایا۔ افتتاحی سیزن کی کامیابی نے نئی خواتین ٹیلنٹ کو ابھارنے، علاقائی خواتین کرکٹ کے معیار کو بلند کرنے اور مستقبل کی ترقی کے لیے مستحکم بنیاد فراہم کی۔
پشاور آل اسٹارز، جو پہلی ٹورنامنٹ کی چیمپئن ٹیم تھی.اب سیزن 2 میں اپنے ٹائٹل کے دفاع کے لیے پرعزم ہیں۔ چیئرمین پشاور زلمی و زلمی فاؤنڈیشن جناب جاوید آفریدی نے لیگ کی ترقی اور خواتین کرکٹ پر اس کے مثبت اثرات پر فخر کا اظہار کرتے ہوئے اس عزم کا اعادہ کیا کہ زلمی فاؤنڈیشن صنفی مساوات، نوجوانوں کی بااختیاری اور خواتین کو پائیدار مواقع فراہم کرنے کے مشن پر گامزن رہے گی۔
About the Author
