پولیس کی طرح صحافیوں کی ڈیوٹی بھی انتہائی سخت، صحت مندانہ سرگرمیاں قابل تحسین،آئی جی پی خیبرپختونخوا
پہلے سیمی فائنل میں پی پی سی قبائل نے پی پی سی پینتھرز کو سنسنی خیز مقابلے کے بعد شکست دیکر فائنل تک رسائی حاصل کرلی
پشاور(سپورٹس رپورٹر) انسپکٹر جنرل آف پولیس خیبرپختونخوا چودھری ذوالفقار حمید نے کہا ہے کہ پولیس کی طرح صحافی برادری کی ڈیوٹی بھی نہایت مشکل اور کڑی ہوتی ہے ایسے میں صحت مندانہ سرگرمیاں ان کی پیشہ ورانہ صلاحیتوں میں بہتری کے لئے نہایت ضروری ہیں ان خیالات کا اظہار انہوں نے پشاور پریس کلب کے زیر اہتمام منعقدہ آر ایم آئی میڈیا کرکٹ لیگ کے سیمی فائنل میچ کے موقع پر بطور مہمان خصوصی گفتگو کرتے ہوئے کیا اس موقع پر ان کے ہمراہ صدر پشاور پریس کلب ایم ریاض،سی سی پی آو ڈاکٹر میاں سعید، شہزادہ کوکب، صدر کے ایچ یو جے کاشف الدین، سینئر صحافی شمیم شاہد، جنرل سیکرٹری طیب عثمان اور چیئرمین سپورٹس کمیٹی عرفان موسی زی سمیت کثیر تعداد میں صحافی موجود تھے،
آئی جی پی نے پریس کلب کی اس کاوش کو سراہتے ہوئے کہا کہ اس طرح کی سرگرمیاں صحافیوں کے لئے نہ صرف تفریح کا ذریعہ بنتی ہیں بلکہ ان کے اعصابی دباؤ کو کم کرنے میں بھی مددگار ہوتی ہیں انہوں نے امید ظاہر کی کہ مستقبل میں بھی اس نوعیت کے پروگرام جاری رہیں گے انہوں نے مزید کہا کہ آئندہ پولیس اور صحافیوں کے مابین دوستانہ کرکٹ میچ کا انعقاد کیا جائے گا تاکہ دونوں اداروں کے درمیان بہتر ہم آہنگی اور تعلقات کو مزید فروغ دیا جا سکے۔ان کا کہنا تھا کہ خیبرپختونخوا پولیس نے ہمیشہ عوام کے جان و مال کے تحفظ کے لئے بھرپور کردار ادا کیا ہے۔پولیس فورس نے ہر موقع پر امن و امان کی خاطر اپنی جانوں کا نذرانہ پیش کیا ہے جس کی مثال نہیں ملتی۔ میچ کے تفصیلات کے مطابق گزشتہ روز جمخانہ کرکٹ گراونڈ پر کھیلے گئے پہلے سیمی فائنل میں پی پی سی پینتھرز نے پہلے بیٹنگ کرتے ہوئے مقررہ اوورز میں 5وکٹوں کے نقصان پر 98 رنز اسکور کئے، جس میں زاہد مداد 49ناٹ آوٹ رنز کے ساتھ نمایاں رہے۔ ارسلان نے 21رنز بنائے۔قبائل کی جانب سے کپتان بلال آفریدی نے بہترین بولنگ کی اور صرف 9رنز دیکر چار کھلاڑیوں کا آوٹ کیا،جواب میں پی پی سی قبائل نے مطلوبہ ہدف آخری اوور کے پانچویں بال پرچکا لگا کر پورا کیا۔شاہ فیصل نے تین چھکوں کی مدد سے 34رنز بنائے۔ بلال آفریدی نے دو چھکوں کی مدد سے سولہ رنز بناکر ٹیم کی فتح میں اہم کردار ادا کیا۔شاہد آفریدی نے 14رنز بنائے۔زاہد امداد نے دو جبکہ اسرار اور تنویر نے ایک ایک وکٹ حاصل کی،بلال آفریدی شاندار آل راونڈر کارکردگی پر مین آف دی میچ قرار دیا گیا۔
About the Author
