پشاور(سپورٹس رپورٹر) ڈائریکٹریٹ آف اسپورٹس خیبر پختونخوا اور ضلعی انتظامیہ پشاور کی جانب سے ریجنل اسپورٹس آفس پشاور کے زیرِ اہتمام کشمیر پر بھارت کے غاصبانہ قبضے کے خلاف اور کشمیری عوام سے اظہارِ یکجہتی کے لیے ایک پرامن واک اور تصویری نمائش کا انعقاد کیا گیا۔ اس موقع پر ڈائریکٹر جنرل اسپورٹس خیبر پختونخواتاشفین خیدر، ڈائریکٹریٹ کے افسران، جملہ سٹاف، اور مختلف کھیلوں سے تعلق رکھنے والے کھلاڑیوں نے کثیر تعداد میں شرکت کی۔
شرکاء نے کشمیری عوام کے حقِ خودارادیت کے حق میں بینرز اور پلے کارڈز اٹھا رکھے تھے جن پر “کشمیر بنے گا پاکستان” اور “ہم کشمیریوں کے ساتھ ہیں” جیسے نعرے درج تھے۔واک کے اختتام پر تصویری نمائش کا اہتمام کیا گیا جس میں کشمیر میں بھارتی مظالم اور وہاں کے عوام کی قربانیوں کو تصویری انداز میں اجاگر کیا گیا۔ نمائش دیکھنے والوں نے تصاویر کے ذریعے کشمیر کے حالات کو بخوبی محسوس کیا اور کشمیری عوام کے ساتھ مکمل یکجہتی کا اظہار کیا۔ڈائریکٹر جنرل اسپورٹس خیبر پختونخوا تاشفین خیدر نے اس موقع پر خطاب کرتے ہوئے کہا کہ کشمیر پاکستان کی شہ رگ ہے اور کشمیری عوام کی جدوجہد آزادی دراصل ہر پاکستانی کے دل کی آواز ہے۔
کھیلوں کے میدانوں سے بھی ہم دنیا کو امن، انصاف اور آزادی کا پیغام دیتے رہیں گے۔واک اور نمائش کے دوران شرکا نے قومی ترانے کے ساتھ ساتھ کشمیری عوام کے حق میں نعرے بھی لگائے، جبکہ آخر میں ملک و ملت اور کشمیری عوام کے لیے خصوصی دعا بھی کی گئی۔
About the Author
