پشاور: محکمہ کھیل و آمور نوجوانان خیبر پختونخوا نے صوبائی حکومت کے ایجنڈے پر عمل کرتے ہوئے نومبر میں خیبر پختونخوا گیمز کے انعقاد کا فیصلہ کیا ہے جس میں صوبے بھر کے سکولز ،کالجز اور مدارس کے کھلاڑیوں کو شامل کیا جائے گا۔ ڈائریکٹوریٹ جنرل سپورٹس خیبرپختونخوا کے تحت پشاور سپورٹس کمپلیکس میں جمعرات کے روز سیکرٹری محکمہ کھیل و آمور نوجوانان خیبرپختونخوا سعادت حسن کی زیر صدارت ایک اجلاس منعقد ہوا جس میں ڈائریکٹر جنر ل سپورٹس خیبر پختونخوا تاشفین حیدر کے علاو ہ ڈائریکٹوریٹ جنرل سپورٹس کے دیگر ڈائریکٹرز و ماتحت افسران،ریجنل سپورٹس آفیسرز اور ڈسٹرک سپورٹس آفیسرز نے شرکت کی۔
اجلاس میں سیکرٹری سپورٹس اور ڈائریکٹر جنرل سپورٹس نے تمام ریجنل آفیسرز کو نومبر میں ہونے والے خیبر پختونخوا گیمز کو کامیاب بنانے کیلئے تمام اضلاع کے سکولز ،کالجز اور مدارس سے نئے ٹینلٹ کو شامل کرنے کیلئے تمام سہولیات فراہم کرنے کی ہدایت کی اور کہا کہ خیبر پختونخوا گیمز کیلئے وہ کیمپ کا انعقاد کریں۔ خیبر پختونخوا گیمز میں صوبے بھر کے کھلاڑیوں کیلئے 26 میل گیمز جبکہ 17 فیمیل گیمز شامل کیئے ہیں۔
یہ گیمز انٹر ریجنل اور اور انٹر ڈسٹرک لیول پر کھیلے جائیں گے۔ سیکرٹری سپورٹس نے تمام ریجنل آفیسرز کو فلڈ ریلیف میچ کو کامیاب بنانے پر انکی کارکردگی کو سراہتے ہوئے کہا کہ ڈائریکٹوریٹ جنرل سپورٹس نے جس طرح سیلاب سے متاثرہ افراد کے امداد کیلئے کوشش کی ہے وہ قابل ستائش ہے۔سیکرٹری سپورٹس اور ڈائریکٹرجنرل سپورٹس نے فلڈ ریلیف میچ میں بہترین کارکردگی پر ڈسٹرک سپورٹس آفیسر چارسدہ گل رخ یاسر اور ڈسٹرک سپورٹس آفیسر مہمند فیصل جاوید کو تعریفی اسناد سے بھی نوازا۔ سیکرٹری سپورٹس نے تمام ریجنل آفیسرز کو ہدایت کی کہ وہ تمام اضلاع میں جاری ترقیاتی کاموں کا باقاعدہ وزٹ کریں تاکہ محکمہ کھیل کے تمام اضلاع میں جاری ترقیاتی منصوبوں کو بروقت مکمل کیا جاسکے اور ان تمام ترقیاتی منصوبوں کے پراگرس رپورٹ ماہانہ بنیاد پر ڈائریکٹریٹ کو ارسال کریں۔
سیکرٹری سپورٹس اور ڈائریکٹر جنرل سپورٹس نے کہا کہ تمام ریجنل آفیسرز کو گیمز کے حوالے سے سالانہ کلینڈر اور ماہانہ رپورٹ بھی ڈائریکٹریٹ کے پاس باقاعدگی کے ساتھ جمع کریں۔سیکرٹری سپورٹس نے کہا کہ تمام ریجنل سپورٹس آفیسرز اور ڈسٹرک سپورٹس آفیسرز اضلاع میں سپورٹس ایسوسی ایشنز کے ساتھ لیزان رکھے تاکہ کھیلوں کے فروغ کیلئے میرٹ کی بنیاد پر نیا ٹینلٹ سامنے آسکے۔
About the Author
