پشاور (سپورٹس رپورٹر) آل پاکستان نیشنل مینز سکواش چیمپئن شپ کا پشاور سپورٹس کمپلیکس کے قمرزمان سکواش کورٹ میں آغاز ہو گیا ہے جس میں ملک بھر سے 90سے زائد باصلاحیت نوجوان سکواش کھلاڑی حصہ لے رہے ہیں،چیمپئن شپ کی افتتاحی تقریب کے مہمان خصوصی سیکرٹری سپورٹس خیبرپختونخوا محمد آصف خان تھے اس موقع پر سابق عالمی چیمپئن لیجنڈ قمر زمان، لیجنڈ محب اللہ خان،صوبائی سکواش ایسوسی ایشن کے فنانس سیکرٹری وزیر محمد، ایسوسی ایٹ سیکرٹری سجاد خلیل، سینئر کوچ اور چیف آرگنائزر منور زمان اور کوچ طاہر اقبال سمیت دیگر اہم شخصیات موجود تھیں۔تقریب سے خطاب کرتے ہوئے سیکرٹری سپورٹس محمد آصف خان نے چیمپئن شپ کے انعقاد پر خوشی کا اظہار کرتے ہوئے کہا کہ اس طرح کے مقابلے نوجوان کے ٹیلنٹ کو نکھارنے اور کھیل کے فروغ میں اہم کردار ادا کرتے ہیں انہوں نے ایونٹ کے کامیاب انعقاد پر منتظمین اور کھلاڑیوں کی کاوشوں کو سراہا۔پہلے روز کھیلے گئے میچز میں پی اے ایف کے محمد علی خان،پاک آرمی کے فہیم احمد،خیبر پختونخوا کے محمد فاد خان،پنجاب کے نواز خان نے اپنے اپنے میچز جیت لئے اسی طرح خیبرپختونخوا کے انتخاب عالم،تنویر قمر،واد حسین،کامران حسین،خوشحال ریاض خان،عبید اللہ،فہد شریف،نعمان شاہد اور شہزاد سمیت آرمی کے نعمان خان،پنجاب کے سلمان سلیم اور واپڈا کے عبداللہ نواز نے اپنے اپنے مقابلوں میں کامیابی حاصل کر لی ۔
About the Author
