فرنٹیئر کالج ، باچاخان کالج اور سٹی گرلز کالج گلبہار نے اپنے اپنے میچ جیت لیا فائنل آج کھیلا جائیگا
پشاور ( سپورٹس رپورٹر) ڈائریکٹوریٹ آف ہائر ایجوکیشن خیبرپختونخوا کے زیرِ اہتمام پشاور زون انٹر کالجز فٹبال ٹورنامنٹ کا آغاز گورنمنٹ گرلز کالج فرنٹیئر کالج برائے خواتین میں ہوگیا۔ ٹورنامنٹ کا افتتاح وائس پرنسپل فرنٹیئر کالج حادیہ سعید نے کیا۔
افتتاحی تقریب میں ڈائریکٹر سپورٹس ٹورنامنٹ فرنٹیئر کالج گل صنوبر اخلاص، ڈائریکٹر سپورٹس سٹی گرلز کالج گلبہار نجمہ قاضی، باچا خان کالج کی افشین، کوچز، آفیشلز اور دیگر معزز شخصیات نے شرکت کی۔ ٹورنامنٹ کا پہلا میچ گورنمنٹ گرلز کالج باچا خان اور زریاب کالج کے درمیان کھیلا گیا.
جس میں گورنمنٹ گرلز کالج باچا خان نے عمدہ کارکردگی کا مظاہرہ کرتے ہوئے زریاب کالج کو 0-2 سے شکست دی۔دوسرا میچ فرنٹیئر کالج اور نحقی کالج کے درمیان کھیلا گیا، جس میں فرنٹیئر کالج نے یکطرفہ مقابلے کے بعد 0-4 سے کامیابی حاصل کی۔
مہمانانِ خصوصی نے ٹورنامنٹ کے انعقاد کو خوش آئند قرار دیتے ہوئے کہا کہ اس طرح کی سرگرمیاں طالبات میں کھیلوں کے فروغ اور صحت مند مقابلے کی فضا قائم کرنے میں اہم کردار ادا کرتی ہیں۔ ٹورنامنٹ کے سیمی فائنل اور فائنل میچ آج کھیلے جائیں گے۔
About the Author
