دبئی:انڈیا انڈر19ٹیم نے انڈر 19 ایشیا کپ مینز ون ڈے ٹورنامنٹ کے دوسرے میچ میں پاکستان انڈر 19 کو 90 رنز سے شکست دیدی۔گروپ اے کے اس میچ میں جو 49 اوورز کا کردیا گیا تھا ، پاکستان انڈر 19 نے ٹاس جیت کر انڈیا انڈر 19کو بیٹنگ دی جو 46 اعشاریہ ایک اوورز میں 240 رنز بناکر آوٹ ہوگئی۔ پاکستان انڈر 19 ٹیم 241 کے ہدف کے تعاقب میں 41اعشاریہ 2 اوورز میں 150 رنز بناکر آوٹ ہوگئی۔پاکستان کی اننگز میں وقفے وقفے سے وکٹیں گرتی رہیں۔
عثمان خان 16 سمیر منہاس 9 علی حسن بلوچ صفر اور احمد حسین 4 رنز بناکر آوٹ ہوئے تو مجموعی سکور 4 وکٹوں پر صرف 30 رنز تھا۔ حذیفہ احسن کی کوشش ناکافی ثابت ہوئی وہ 9 چوکوں اور 2 چھکوں کی مدد سے70 رنز بناکر آوٹ ہوئے۔کپتان فرحان یوسف نے 23 رنز سکور کیے۔دیپیش دیوندرن اور کانشک چوہان نے تین تین وکٹیں حاصل کیں۔اس سے قبل انڈیا کی اننگز میں ارون جارج 12 چوکوں اور ایک چھکے کی مدد سے 85 رنز بناکر عبدالسبحان کی گیند پر آوٹ ہوئے جنہوں نے 42 رنز دے کر 3وکٹیں حاصل کیں۔
محمد صیام نے بھی 3 کھلاڑیوں کو 67رنز کے عوض آوٹ کیا جن میں ویبھا سوریا ونشی (5) کپتان آیوش مہاترے (38) کی اہم وکٹیں بھی شامل تھیں۔ نقاب شفیق نے دو کھلاڑیوں کو آوٹ کیا۔ احمد حسین اور علی رضا کے حصے میں ایک ایک وکٹ آئی۔پاکستان انڈر 19 ٹیم 16 دسمبر کو آخری گروپ میچ میں متحدہ عرب امارات انڈر 19 کے خلاف مدمقابل ہوگی۔ٹورنامنٹ کے سیمی فائنلز 19 دسمبر کو کھیلے جائیں گے جبکہ فائنل 21دسمبر کو ہوگا۔
About the Author
