سنسنی خیز مقابلے کے بعد قبائل کو شکست دے کر فائنل اپنے نام کرلی، مہمان خصوصی سیکرٹری انفارمیشن محمد بختیار خان نے انعامات تقسیم کئے
ہمایون خان
پشاور: آر ایم آئی میڈیا کرکٹ لیگ کا سنسنی خیز فائنل پی پی سی مارخور نے جیت لیا۔ مارخور نے آخری اوور میں بہترین کارکردگی کا مظاہرہ کرتے ہوئے پی پی سی قبائل کو شکست دے کر چیمپئن کا اعزاز اپنے نام کر لیا۔اختتامی تقریب کے مہمان خصوصی سیکرٹری اطلاعات و تعلقات عامہ خیبر پختونخوا محمد بختیار خان تھے جنہوں نے کھلاڑیوں میں انعامات تقسیم کئے
اس موقع پر مس ملیسا کورکم نیشنل ہیڈ یونیسیف، شفیع اللہ خان کوآرڈینیٹر ایمرجنسی آپریشن سنٹر برائے انسداد پولیو خیبر پختونخوا، ڈی جی انفارمیشن عمران خان، ملک اسماعیل خان، کیپٹل میٹرو پولیٹن کے افسران، صدر پشاور پریس کلب ایم ریاض، صدر کے ایچ یو جے کاشف الدین، سینئر صحافی شمیم شاہد اور چیئرمین سپورٹس کمیٹی عرفان موسیٰ زئی سمیت بڑی تعداد میں صحافی موجود تھے۔مہمان خصوصی محمد بختیار خان نے اپنے خطاب میں کہا کہ صحافیوں کی کھیلوں میں غیر معمولی دلچسپی قابل تعریف ہے
انہوں نے کہا کہ موجودہ دور میں پیشہ ورانہ ذمہ داریوں کے ساتھ ساتھ کھیل کود کے لئے وقت نکالنا انتہائی ضروری ہے کیونکہ کھیل جسمانی اور ذہنی تندرستی کے لئے ناگزیر ہیں انہوں نے ایسے ایونٹس کے تسلسل پر زور دیتے ہوئے کہا کہ اس سے صحافی برادری کو صحت مندانہ سرگرمیوں کے مزید مواقع میسر آتے ہیں۔
میچ کے تفصیلات کے مطابق جمخانہ کرکٹ گراؤنڈ پشاور میں کھیلے گئے فائنل میں پی پی سی قبائل نے پہلے بیٹنگ کرتے ہوئے مقررہ اوورز میں 6 وکٹوں کے نقصان پر 137 رنز بنائے کامران خان 37، بلال آفریدی 30 اور شاہد آفریدی 29 رنز کے ساتھ نمایاں رہے۔
مارخور کی جانب سے ارشد یوسفزئی نے شاندار باؤلنگ کا مظاہرہ کرتے ہوئے 3 کھلاڑیوں کو آؤٹ کیا، قاری گل رحمان نے دو جبکہ رضوان نے ایک وکٹ حاصل کی۔ہدف کے تعاقب میں پی پی سی مارخور نے ذمہ دارانہ بیٹنگ کا مظاہرہ کرتے ہوئے آخری اوور میں 4 وکٹوں کے نقصان پر ٹارگٹ حاصل کرلیا
وسیم نے 53 اور یاسر علی نے 46 رنز کی شاندار اننگز کھیل کر ٹیم کی کامیابی میں اہم کردار ادا کیا وسیم کو میچ کا بہترین کھلاڑی قرار دیا گیا جبکہ ٹورنامنٹ کے بہترین بیٹر یاسر علی اور بہترین بولر شاہد آفریدی ٹھہرے۔آخر میں مہمان خصوصی اور دیگر شخصیات نے کھلاڑیوں میں شیلڈز اور انعامات تقسیم کئے۔
www:sportslinehd.com
About the Author
