سپورٹس رپورٹر
پشاور: وزیراعلیٰ خیبر پختونخوا کے مشیر برائے کھیل اور امور نوجوانان تاج محمد ترند نے کہا ہے کہ عمران خان کرکٹ سٹیڈیم پشاور کے تعمیراتی کاموں پر رفتار مزید تیز کی جائے اوراسے جلد از جلد کھیلوں کی سرگرمیوں کے لئے تیار کیا جائے۔ انہوں نے سختی سے تاکید کی کہ سٹیڈیم کو بین الاقوامی معیار کے مطابق تعمیر کیا جائے اور کام کے معیار میں کسی قسم کی کمی ہر گز برداشت نہیں کی جائے گی۔ ان خیالات کا اظہار انہوں نے عمران خان کرکٹ سٹیڈیم پشاور کے دورے کے دوران متعلقہ افسران سے بات چیت کرتے ہوئے کیا۔ اس موقع پر سیکرٹری کھیل و امورِ نوجوانان خیبر پختونخوا سعادت حسن، ڈی جی سپورٹس ڈیپارٹمنٹ تاشفین حیدر، ڈائریکٹر ڈیویلپمنٹ منیر عباس، ڈائریکٹر ورکس احمد علی، ڈائریکٹر عمران خان کرکٹ سٹیڈیم جعفر شاہ اور دیگر متعلقہ افسران بھی موجود تھے۔دورے کے دوران مشیر کھیل نے عمران خان کرکٹ سٹیڈیم کے ترقیاتی کاموں کے معیار اور کام کی رفتار کا تفصیلی جائزہ لیا اور کہا کہ صوبائی حکومت نوجوانوں کو کھیلوں کی زیادہ سے زیادہ سہولیات فراہم کرنے کے لئے تمام تر وسائل بروئے کار لا رہی ہے اور اس مقصد کے لئے صوبے کی ضلعی اور تحصیل سطح پر کھیلوں کے فروغ کے لئے متعدد منصوبے شروع کئے جارہے ہیں تاکہ صحت مندانہ سرگرمیوں میں اضافہ کیا جا سکے۔ انہوں نے کہا کہ عمران خان کرکٹ سٹیڈیم پشاور کا تعمیری منصوبہ انتہائی اہمیت کا حامل ہے اور موجودہ حکومت کی یہ اولین خواہش ہے کہ کھیل کے شائقین کی امنگوں کے مطابق اس کے تعمیری کام کو جلد مکمل کیا جائے- انہوں نے متعلقہ افسران سے کہا کہ منصوبے کی تکمیل میں حائل مسائل کو بروقت ان کے نوٹس میں لایا جائے تاکہ یہ منصوبہ مزید تاخیر کا شکار نہ ہو۔
About the Author
