پی پی سی پینتھرز، قبائل، مارخور اور اسٹارز سیمی فائنل میں پہنچ گئے
پشاور(سپورٹس رپورٹر) آر ایم آئی میڈیا کرکٹ لیگ اپنے آخری مرحلے میں داخل ہوگئی ہے، جہاں کھیلے گئے سنسنی خیز کوارٹر فائنل مقابلوں کے بعد پی پی سی پینتھرز، قبائل، مارخور اور اسٹارز نے سیمی فائنل کے لئے کوالیفائی کرلیا۔ گزشتہ روز جمخانہ کرکٹ گراؤنڈ پر کھیلے گئے پہلے کوارٹر فائنل میں پی پی سی شاہین نے پہلے بیٹنگ کرتے ہوئے مقررہ اوورز میں 4 وکٹوں کے نقصان پر 73 رنز اسکور کئے، جس میں امجد خان 47 رنز کے ساتھ نمایاں رہے۔ جواب میں پی پی سی پینتھرز نے مطلوبہ ہدف بآسانی حاصل کرلیا، جبکہ ارسلان ٹِکر کو شاندار آل راؤنڈ کارکردگی پر مین آف دی میچ قرار دیا گیا۔
دوسرے کوارٹر فائنل میں پی پی سی بلز نے پہلے کھیلتے ہوئے 8 وکٹوں کے نقصان پر 48 رنز بنائے، جہاں ناصر 14 رنز کے ساتھ نمایاں بیٹر رہے۔ قبائل کی ٹیم نے ہدف بآسانی حاصل کیا جبکہ کامران علی بہترین کارکردگی پر مین آف دی میچ رہے۔تیسرے کوارٹر فائنل میں پی پی سی مارخور نے بیٹنگ کرتے ہوئے 10 اوورز میں 120 رنز کا بڑا ہدف دیا، یاسر علی 39 رنز کے ساتھ نمایاں رہے۔ جواب میں پی پی سی چیتا کی ٹیم مطلوبہ ہدف حاصل نہ کر سکی اور مارخور نے 38 رنز سے کامیابی حاصل کی۔ ارشد یوسفزئی بہترین باؤلنگ اور بیٹنگ کارکردگی پر مین آف دی میچ قرار پائے۔آخری کوارٹر فائنل میں ٹورنامنٹ کا سب سے بڑا اپ سیٹ سامنے آیا جہاں پی پی سی اسٹارز نے زلمی کو شکست دے کر سیمی فائنل میں جگہ بنالی۔ پی پی سی زلمی نے پہلے کھیل کر مقررہ اوورز میں 121 رنز بنائے، زوار نے 39 رنز اسکور کئے۔ جواب میں اسٹارز نے عمدہ بیٹنگ کا مظاہرہ کرتے ہوئے ہدف 8 وکٹوں سے حاصل کرلیا۔ ذیشان لیاقت نے شاندار 53 رنز بنا کر میچ کے بہترین کھلاڑی کا اعزاز حاصل کیا۔
About the Author
