پشاور (ہمایون خان سپورٹس/کلچر رپورٹر) آر ایم آئی میڈیا کرکٹ لیگ میں دلچسپ اور سنسنی خیز مقابلے جاری ہیں، جہاں پی پی سی قبائل، چیتا، زلمی اور پینتھرز کی ٹیموں نے کوارٹر فائنل کے لیے کوالیفائی کرلیا۔ جمخانہ کرکٹ گراونڈ پشاور میں منعقدہ مقابلوں
کے موقع پر مہمان خصوصی سی سی پی او ڈاکٹر میاں سعید احمد نے کھلاڑیوں میں انعامات تقسیم کیے۔
اس موقع پر صدر پشاور پریس کلب ایم ریاض، سیکرٹری طیب عثمان، سینئر صحافی شمیم شاہد، ایس پی ارشد خان، ڈی ایس پی اعجاز نبی، سیکرٹری خیبر یونین آف جرنلسٹس ارشاد علی، چیئرمین سپورٹس کمیٹی عرفان موسیٰ زئی سمیت کثیر تعداد میں صحافی موجود تھے۔ پہلے میچ میں پی پی سی قبائل نے قلندرز کو دس وکٹوں سے شکست دی قلندرز نے پہلے کھیلتے ہوئے مقررہ اوورز میں سات وکٹوں کے نقصان پر 54 رنز بنائے، قبائل کی جانب سے شاہد آفریدی نے دو وکٹیں حاصل کیں جواب میں قبائل نے ہدف بغیر
کسی نقصان کے حاصل کرلیا، اسد صابری 41 رنز بنا کر ناٹ آٹ رہے اور میچ کے بہترین کھلاڑی قرار پائے۔
دوسرے میچ میں پی پی سی چیتا نے شاہین کو 24 رنز سے شکست دی چیتا نے پہلے بیٹنگ کرتے ہوئے 116 رنز اسکور کیے جن میں ارشاد کے 36 رنز نمایاں تھے جواب میں شاہین کی ٹیم 6 وکٹوں پر 92 رنز بنا سکی چیتا کے فہد اور زرشاد نے دو، دو وکٹیں حاصل کیں جبکہ زرشاد پلیئر آف دی میچ قرار پائے۔ تیسرا میچ پی پی سی ڈولفن اور زلمی کے درمیان ہوا، جس میں ڈولفن نے پہلے کھیلتے ہوئے 73 رنز بنائے۔ طیب عثمان 35 رنز بنا کر ناٹ آٹ رہے۔ جواب میں زلمی نے مطلوبہ ہدف تین وکٹوں کے نقصان پر حاصل کرلیا۔ نبی جان میچ کے بہترین کھلاڑی قرار پائے۔
آخری میچ میں پی پی سی پینتھرز نے مارخور کو 8 وکٹوں سے شکست دی مارخور نے پہلے بیٹنگ کرتے ہوئے مقررہ اوورز میں 6 وکٹوں کے نقصان پر 65 رنز بنائے، ارشد یوسفزئی 35 رنز کے ساتھ نمایاں رہے۔ جواب میں پینتھرز نے ہدف باآسانی حاصل کرلیا۔ ذاہد امداد کو بہترین کھلاڑی کا ایوارڈ دیا گیا۔اختتامی تقریب سے خطاب کرتے ہوئے سی سی پی او میاں سعید احمد نے کہا کہ معاشرتی برائیوں کے خاتمے کے لیے اس نوعیت کی سرگرمیاں انتہائی موثر ہیں
انہوں نے کہا کہ پشاور پریس کلب کی جانب سے صحت مند سرگرمیوں کے فروغ کے لیے ایسے ایونٹس کا انعقاد قابل تعریف ہے ان کا کہنا تھا کہ پشاور کی صحافی برادری نے ہمیشہ پیشہ ورانہ ذمہ داریوں کو احسن طریقے سے نبھایا ہے آخر میں انہوں نے سپورٹس کمیٹی اور دونوں ٹیموں کے لیے کیش انعام کا اعلان بھی کیا۔
About the Author
