وزیراعلی مراد علی شاہ نے مشعل بردار ریلی کی قیادت کی نیشنل گیمز 6 دسمبر سے کراچی میں شروع ہوں گے
کراچی: 35ویں نیشنل گیمز 2025ء کے آغاز سے قبل شہر میں جوش و خروش عروج پر ہے۔ وزیراعلی سندھ سید مراد علی شاہ آج تاریخ مزار قائد پہنچے جہاں انہوں نے گیمز کی مشعل بردار ریلی کی قیادت کی۔ ان کی آمد پر وزیر کھیل محمد بخش مہر، صوبائی وزراء اور دیگر افسران نے ان کا پرتپاک استقبال کیا۔ وزیراعلی سندھ نے 35ویں نیشنل گیمز کی مشعل بردار ریلی کی قیادت کی جو مزار قائد سے شروع ہوئی اور شاہراہِ قائدین، شاہراہِ فیصل، دو تلوار سے ہوتی ہوئی ساحل سمندر تک پہنچی۔ ریلی کے دوران کریک کلب اور میرینا کلب میں قومی کھیلوں کی مشعل کو کروز پر بھی لے جایا گیا۔ ترجمان وزیراعلی سندھ کے مطابق 35واں نیشنل گیمز 6 تا 13 دسمبر 2025ء تک کراچی میں منعقد ہوں گے۔ گیمز کی شاندار افتتاحی تقریب 6 دسمبر کو نیشنل اسٹیڈیم کراچی میں منعقد ہوگی۔ صدرِ مملکت آصف علی زرداری تقریب کے مہمانِ خصوصی ہوں گے۔ جبکہ اختتامی تقریب کے مہمان خصوصی وزیراعظمِ محمد شہباز شریف ہوں گے۔ نیشنل گیمز میں مختلف صوبوں اور اداروں سے گیارہ ہزار سے زائد کھلاڑی اور آفیشلز شرکت کریں گے۔نیشنل گیمز میں ٹوٹل 34 کھیل شامل کئے گئے ہیں۔ جن میں 25 اولمپک اور 9 نان اولمپک کھیل ہیں۔ یہ گیمز کراچی کے مختلف مقامات پر کھیلے جائیں گے۔ سندھ حکومت نے ایونٹ کی نگرانی کے لیے خصوصی سیل اور کمیٹی قائم کی ہے۔ وزیراعلیٰ سندھ کے ترجمان نے کہا کہ یہ ایونٹ کراچی میں شاندار انداز میں منعقد ہوگا جو نہ صرف کھیلوں کے جذبے کو فروغ دے گا بلکہ ملک بھر کے کھلاڑیوں کو اپنی صلاحیتوں کا مظاہرہ کرنے کا ایک بہترین موقع فراہم کرے گا۔
About the Author
