تقریب میں سیکرٹری اطلاعات خیبر پختونخوا محمد بختیار خان، ڈی جی انفارمیشن محمد عمران کی خصوصی شرکت
پشاور (سپورٹس رپورٹر) آر ایم آئی میڈیا کرکٹ لیگ کے افتتاحی میچز جمخانہ کرکٹ گراونڈ پشاور میں شاندار انداز میں منعقد ہوئے۔ افتتاحی تقریب کے بعد آج لیگ کے تحت چار دلچسپ میچز کھیلے گئے جن میں پشاور پریس کلب کی مختلف ٹیموں نے حصہ لیا۔پہلے میچ میں PPC مارخور نے عمدہ کارکردگی دکھاتے ہوئے اپنے حریف ٹیم پی پی سی لائن کو 67 رنز سے شکست دی،مارخور کی طرف سے وسیم اور یاسر نے شاندار بیٹینگ کا مظاہرہ کرتے ہوئے 36اور 37 رنز بنا دئے،
دوسرے میچ میں PPC زلمی نے پی پی سی شارکس کو شکست دے کر کامیابی حاصل کی بہترین باولنگ پر وسیم کو مین آف دی میچ کے ایوارڈ سے نوازا گیا۔ تیسرے میچ میں PPC چیتا نے بہترین کارکردگی کا مظاہرہ کرتے ہوئے میدان مار لیا بہترین کارکردگی پر واجد شہزاد کو مین آف دی میچ کا ایوارڈ دیا گیا جبکہ چوتھے میچ میں PPC قبائل نے پی پی سی سٹارز کو ہرا کر میچ اپنے نام کر لیا جبکہ مین آف دی میچ کا ایوارڈ بہترین بیٹنگ کارکردگی پر شاہ فیصل کو دیا گیا میچز کے دوران صحافیوں کی بڑی تعداد نے کھلاڑیوں کی حوصلہ افزائی کی۔ اس موقع پر تقریب میں سیکرٹری اطلاعات خیبر پختونخوا محمد بختیار خان، ڈی جی انفارمیشن محمد عمران، سینئر صحافی، پریس کلب کے صدر ایم ریاض اور سپورٹس کمیٹی کے چئیرمین عرفان موسی زئی سمیت دیگر صحافیوں نے شرکت کی.
پہلے دن کے میچز میں منعقدہ تقریب سے خطاب کرتے ہوئے سیکرٹری اطلاعات خیبر پختونخوا محمد بختیار خان نے کہا کہ میڈیا کرکٹ لیگ جیسے مثبت اور صحت مند ایونٹس نہ صرف صحافیوں میں باہمی ہم آہنگی اور بھائی چارہ بڑھاتے ہیں بلکہ ان سے صحافتی برادری میں ٹیم ورک، اعتماد اور کھیلوں کے فروغ کا جذبہ بھی پروان چڑھتا ہے۔انہوں نے کہا کہ محکمہ اطلاعات صحافیوں کی فلاح و بہبود اور مثبت سرگرمیوں کے فروغ کے لیے ہر ممکن تعاون جاری رکھے گا تاکہ میڈیا برادری کو تفریح، صحت مند مصروفیات اور باہمی تعلقات کے مواقع میسر آئیں۔
اس موقع پر سیکرٹری اطلاعات نے مین آف دی میچ کھلاڑیوں کو ایوارڈز بھی دیے، جبکہ پشاور پریس کلب کی جانب سے مہمانِ خصوصی اور دیگر معزز مہمانوں کو خصوصی شیلڈز پیش کی گئیں۔انہوں نے آرگنائزرز، پشاور پریس کلب اور آر ایم آئی انتظامیہ کی کاوشوں کو سراہتے ہوئے کہا کہ اس طرح کے ایونٹس سے میڈیا برادری کے درمیان تعلقات مضبوط ہوتے ہیں اور مثبت صحافتی ماحول کو فروغ ملتا ہے۔یاد رہئے کہ آر ایم آئی میڈیا کرکٹ لیگ کا انعقاد پشاور پریس کلب کے زیر اہتمام کیا گیا ہے، جس میں 20 ٹیمیں حصہ لے رہی ہیں۔ یہ میگا ایونٹ 20 روز تک جاری رہے گا۔
About the Author
