کراچی (ہمایون خان سپورٹس/کلچر رپورٹر) پاکستان کا سب سے بڑا قومی کھیلوں کا ایونٹ 35ویں نیشنل گیمز 2025ء اٹھارہ سال کے طویل وقفے کے بعد سندھ واپس آ رہا ہے۔ شہر قائد کراچی کو اس میگا ایونٹ کی میزبانی کا اعزاز حاصل ہوا ہے جہاں پر ملک بھر کے بہترین کھلاڑیوں، اتحاد اور ثقافت کا جشن ہو گا۔ نیشنل گیمز کا افتتاحی تقریب6 دسمبر 2025 اور اختتامی تقریب13 دسمبر 2025ء کو ہوگا۔ یہ کھیل اولمپک کے جذبے کے تحت منعقد کیے جائیں گے جس کا مقصد ملک کے چاروں صوبوں، آزاد جموں و کشمیر، اسلام آباد، سروسز اور محکموں کے چوٹی کے کھلاڑیوں کو ایک پلیٹ فارم پر اکٹھا کرنا ہے۔
تفصیلات کے مطابق کھیلوں میں 9,000 سے زائد کھلاڑی اور آفیشلز کی شرکت متوقع ہے۔ 35 ویں نیشنل گیمز 2025ء کی میزبانی حکومت سندھ کا محکمہ سپورٹس اینڈ یوتھ افیئرز اور سندھ اولمپک ایسوسی ایشن مشترکہ طور پر کر رہے ہیں۔ وزیراعلیٰ سندھ سید مراد علی شاہ نے ان گیمز کو شاندار طریقے منانے کی ہدایت کی ہے اور اس بات پر زور دیا ہے کہ یہ ایونٹ ملک میں قومی یکجہتی کو فروغ دے گا۔وحدت، ٹیلنٹ اور ثقافت کا جشن اولمپک رنگز کے جذبے کے تحت ہونے والا یہ ایونٹ پاکستان میں کھیلوں کے مستقبل کے لیے ایک نئے باب کا آغاز ثابت ہوگا۔گیمز میں مردوں کے 32 اور خواتین کے 29 مقابلوں سمیت کل 61 مختلف کھیلوں کو شامل کیا گیا ہے۔ سندھ حکومت اس تاریخی ایونٹ کی تیاریوں کو حتمی شکل دینے میں مصروف ہے جس میں ایک نئے بین الاقوامی معیار کے سوئمنگ پول کی تعمیر اور الیکٹرانک ٹائمنگ اور اسکورنگ سسٹم کی فراہمی بھی شامل ہے۔ قوم منتظر ہے کہ دسمبر میں کراچی کی سرزمین پر کھیلوں کی یہ شاندار روایات دوبارہ زندہ ہوں گی۔
About the Author
