پشاور: (اسپورٹس رپورٹر) تاج محمد خان ترند نے باضابطہ طور پر وزیراعلی خیبر پختونخوا کے مشیر برائے کھیل و امور نوجوانان کا چارج سنبھال لیا ہے۔ پشاور سپورٹس کمپلیکس پہنچنے پر سیکرٹری سپورٹس خیبر پختونخوا سعادت حسن اور ڈائریکٹر جنرل سپورٹس خیبر پختونخوا تاشفین حیدر نے ان کا پرتپاک استقبال کیا۔ اس موقع پر مشیر کھیل و امور نوجوانان تاج محمد ترند نے اپنے عزم کا اظہار کرتے ہوئے کہا کہمیں اپنے قائد عمران خان کے ویژن کے مطابق اپنی ذمہ داریاں ایمانداری، دیانتداری اور عوامی خدمت کے جذبے کے ساتھ انجام دوں گا۔ انہوں نے مزید کہا کہ خیبر پختونخوا میں کھیلوں کے حوالے سے بے پناہ ٹیلنٹ موجود ہے، جسے پروان چڑھانے کے لیے تمام دستیاب وسائل کو بروئے کار لایا جائے گا۔ مشیر ترند نے محکمہ کھیل خیبر پختونخوا میں جاری ترقیاتی منصوبوں کو بروقت مکمل کرنے اور صوبے میں ترجیحی بنیادوں پر نئے منصوبوں کو شروع کرنے کا بھی اعلان کیا۔اس موقع پر ڈائریکٹر جنرل سپورٹس تاشفین حیدر نے مشیر کھیل تاج محمد ترند کو پشاور سپورٹس کمپلیکس کا دورہ کرایا جہاں انہوں نے کھیلوں کی تمام موجودہ سہولیات کا تفصیلی جائزہ لیا۔
About the Author
