پشاور (سپورٹس رپورٹر) پشاور بورڈ کے زیرِ اہتمام منعقدہ انٹر کالجیٹ گرلز بیڈمنٹن ایونٹ کا فائنل مقابلہ ہدف کالج نے جیت لیا۔ ہدف کالج کی طالبات نے شاندار کارکردگی کا مظاہرہ کرتے ہوئے جناح کالج برائے خواتین پشاور یونیورسٹی کو شکست دی۔
ہدف کالج کی جانب سے لینا، عمیمہ، سپوگمئی، ایمان، اور زونیرہ نے بیڈمنٹن ایونٹ میں حصہ لیا اور اپنی ٹیم کی فتح کو یقینی بنایا۔
ایونٹ کے اختتام پر کالج کی پرنسپل فرح اسد نے کھلاڑیوں میں انعامات تقسیم کیے۔ اس موقع پر ڈائریکٹریس گرلز سپورٹس مریم بشیر، کوچ زعفران، اور ملک فراز بھی موجود تھے۔
پرنسپل فرح اسد نے طالبات کی تعلیم کے ساتھ ساتھ کھیلوں کی سرگرمیوں میں بھر پور حصہ لینے کو خوش آئند قرار دیا۔ انہوں نے کہا کہ
کھیل کسی بھی صحت مند معاشرے اور افراد کے لیے زندگی کا ضروری جزو ہیں۔ طالبات کو تعلیم کے ساتھ ساتھ اسی طرح کھیلوں کی سرگرمیوں میں بھی بڑھ چڑھ کر حصہ لینا چاہیے جس سے ان میں اعتماد بڑھے گا، برداشت پیدا ہوگی اور وہ ایک اچھے معاشرے کی تشکیل میں بہترین کردار ادا کرسکیں گی۔
انہوں نے فاتح طالبات کو مبارکباد دی اور اس عزم کا اعادہ کیا کہ کالج آئندہ بھی طالبات کو کھیلوں کے زیادہ سے زیادہ مواقع فراہم کرنے کے لیے ہر ممکن اقدامات کرے گا۔
About the Author
