ذہانت، ہم آہنگی اور خاندانی اشتراک کینٹ پبلک سکول میں انوکھا تعلیمی و تفریحی پروگرام، والدین اور بچوں کی شاندار شرکت
پشاور (سپورٹس رپورٹر) کینٹ پبلک گرلز ہائی اسکول پشاور کینٹ میں ایک منفرد اور تعلیمی نوعیت کا پروگرام “اسکریبل اینڈ چیس کمپٹیشن” نہایت جوش و خروش کے ساتھ منعقد کیا گیا۔ اس موقع پر والدین اور بچوں نے نہ صرف شرکت کی بلکہ ایک دوسرے کے مدمقابل کھیل کر اپنی ذہانت، تیز فہمی اور ہم آہنگی کا مظاہرہ بھی کیا۔اس دلچسپ تقریب میں اسکول ہال کو رنگا رنگ بینرز اور تعلیمی پوسٹرز سے سجایا گیا تھا جبکہ والدین کی بڑی تعداد اپنی بچیوں کے ساتھ شریک ہوئی۔ شطرنج اور اسکریبل کے مقابلوں میں طلبات اور والدین نے اپنی بہترین کارکردگی دکھائی۔ ذہانت اور الفاظ کے کھیل نے تقریب کو نہ صرف علمی بلکہ جذباتی رنگ بھی دے دیا، جہاں ہر جیت پر خوشی کے نعرے اور ہر غلطی پر دلچسپ تبصرے سننے کو ملے۔پرنسپل محترمہ سائمہ ناز نے تقریب سے خطاب کرتے ہوئے کہا کہ ان مقابلوں کا مقصد بچوں کی ذہنی نشوونما، تجزیاتی صلاحیت اور فیصلہ سازی کی قوت کو بہتر بنانا ہے۔ جب والدین تعلیمی سرگرمیوں میں اپنے بچوں کے ساتھ شریک ہوتے ہیں تو نہ صرف بچوں میں اعتماد بڑھتا ہے بلکہ گھر اور اسکول کے درمیان ایک مضبوط تعلق بھی قائم ہوتا ہے۔ ہمارا مقصد تعلیم کو دلچسپ، مثر اور خاندانی اشتراک کے ذریعے مزید مضبوط بنانا ہے۔انہوں نے مزید کہا کہ جدید ڈیجیٹل دور میں، جہاں بچے زیادہ وقت موبائل اور اسکرین پر گزارتے ہیں، وہاں ایسے مقابلے بچوں کو کتاب، الفاظ، اور تخلیقی سوچ سے جوڑنے کا بہترین ذریعہ ہیں۔محمد وقار وائس پریذیڈنٹ خیبر پختنخواہ شطرنج ایسوسی ایشن ریٹنگ آفیسر چیس فیڈریشن پاکستان نے اس موقع پر گفتگو کرتے ہوئے کہا کہ دنیا کی نمبر ون ایجوکیشنل گیم اسکریبل اور ذہانت کی علامت شطرنج ایسی گیمز ہیں جو طلبا کی زبان، منطق اور فیصلہ سازی کی صلاحیتوں کو نکھارتی ہیں۔ ہمارا مقصد یہ ہے کہ ہر طالب علم ان گیمز کو سیکھ کر اپنے اندر چھپی صلاحیتوں کو اجاگر کرے اور تعلیمی میدان میں نمایاں مقام حاصل کرے۔انہوں نے یہ بھی کہا کہ بدقسمتی سے ہمارے معاشرے میں بیشتر والدین اور طلبا ان گیمز کی علمی اور ذہنی افادیت سے واقف نہیں ہیں۔ جدید دور میں جب لائبریریاں، سٹڈی سینٹرز اور میدان خالی ہوتے جا رہے ہیں، ایسے ایونٹس تعلیمی سرگرمیوں کو دوبارہ فروغ دینے میں اہم کردار ادا کر سکتے ہیں۔پروگرام کے اختتام پر پرنسپل محترمہ سائمہ ناز نے سی ای او کینٹونمنٹ بورڈ پشاور چوہدری بابر حسین اور ڈپٹی سی ای او محترمہ جویریہ کا خصوصی شکریہ ادا کیا جنہوں نے اس پروگرام کے انعقاد کی اجازت اور مکمل تعاون فراہم کیا۔ انہوں نے کہا کہ ان کی رہنمائی اور سرپرستی سے ایسے ایونٹس مستقبل میں بھی تسلسل کے ساتھ منعقد کیے جائیں گے تاکہ والدین اور بچوں کو اسکریبل اور شطرنج جیسی ذہنی کھیلوں کی اہمیت سے مزید آگاہ کیا جا سکے۔آخر میں کامیاب والدین اور طالبات کو شیلڈز، اسناد اور تعریفی کلمات سے نوازا گیا۔ شرکا نے اسکول انتظامیہ کا شکریہ ادا کیا کہ انہوں نے ایک ایسی سرگرمی کا اہتمام کیا جس نے والدین اور بچوں کے درمیان محبت، تعاون اور فکری ہم آہنگی کو ایک نئے زاویے سے اجاگر کیا۔یہ ایونٹ اس بات کا عملی ثبوت تھا کہ تعلیم صرف کتابوں تک محدود نہیں بلکہ ذہانت، کردار، اشتراک اور تجربے کا حسین امتزاج ہے اور کینٹ پبلک گرلز ہائی اسکول پشاور اسی فلسفے کو حقیقت کا روپ دے رہا ہے۔
About the Author
