پشاور (اسپورٹس و بزمِ ادب نیوز)گورنمنٹ گرلز مڈل اسکول گل باچا جی میں جاری سپورٹس گالا 2025ء کے سلسلے میں پینٹنگ و پوسٹر میکنگ مقابلے نہایت جوش و جذبے، تخلیقی امنگ اور رنگوں کی خوبصورت بہار کے ساتھ اختتام پذیر ہوگئے۔ ان مقابلوں میں ضلع پشاور کے مختلف اسکولوں کی طالبات نے بھرپور شرکت کی اور اپنی تخلیقی صلاحیتوں کا بہترین مظاہرہ کیا۔ طالبات نے فطرت، معاشرتی ہم آہنگی، تعلیم کی اہمیت، امن، ماحولیات اور خواتین کے کردار جیسے موضوعات پر خوبصورت رنگوں کے ذریعے اپنے خیالات کا اظہار کیا۔ ان تخلیقی فن پاروں نے حاضرین سے خوب داد وصول کی اور مقابلے کے دوران ہال تالیوں سے گونج اٹھا۔پینٹنگ مقابلے کا مقصد طالبات میں فنِ مصوری کے ذوق کو فروغ دینا، خود اعتمادی پیدا کرنا، تخیل کو جِلا بخشنا اور اظہارِ خیال کے مثبت ذرائع مہیا کرنا تھا۔ اس سرگرمی نے نہ صرف طالبات میں تخلیقی اعتماد کو بڑھایا بلکہ انہیں ٹیم ورک اور صحت مند مقابلے کی روح سے بھی روشناس کرایا۔تقریب کے اختتام پر مہمانِ خصوصی جنرل سیکرٹری بزمِ ادب و سپورٹس محترمہ ثروت منیر نے کامیاب طالبات میں ٹرافیاں، سرٹیفیکیٹس اور تعریفی اسناد تقسیم کیں۔ اپنے خطاب میں انہوں نے کہا کہ ایسے مقابلے طالبات کی پوشیدہ صلاحیتوں کو اجاگر کرنے کا بہترین ذریعہ ہیں۔ مصوری جیسے فنون لطیفہ طلبہ کی شخصیت میں نرمی، گہرائی اور مثبت سوچ پیدا کرتے ہیں۔ اس طرح کی سرگرمیاں نہ صرف اسکول کا تعلیمی ماحول خوشگوار بناتی ہیں بلکہ طالبات کو عملی زندگی کے لیے تیار کرتی ہیں۔ ہیڈ مسٹریس ارم عبرین نے بزمِ ادب و سپورٹس کمیٹی، اساتذہ اور طالبات کا شکریہ ادا کرتے ہوئے کہا ہم نصابی سرگرمیاں تعلیمی سفر کا لازمی حصہ ہیں جو طلبہ و طالبات کی ہمہ جہت ترقی اور شخصیت سازی میں بنیادی کردار ادا کرتی ہیں۔ گل باچا جی اسکول ہمیشہ سے طالبات کی صلاحیتوں کو نکھارنے کے لیے ایسے پلیٹ فارم فراہم کرتا رہا ہے۔”پوسٹر میکنگ :پہلی پوزیشن گورنمنٹ گرلز مڈل اسکول گل باچا جی دوسری پوزیشن (مشترکہ)گورنمنٹ گرلز مڈل اسکول ہزار خوانی، گورنمنٹ گرلز مڈل اسکول ڈھکی منور شاہ تیسری پوزیشن (مشترکہ)گورنمنٹ گرلز مڈل اسکول جہانگیر پورہ، گورنمنٹ گرلز مڈل اسکول زریاب کالونی تقریب کے اختتام پر شرکا نے اسکول انتظامیہ اور بزمِ ادب و سپورٹس کمیٹی کی کاوشوں کو سراہا اور اس عزم کا اظہار کیا کہ ایسے مثبت اور تعلیمی سرگرمیوں کا تسلسل مستقبل میں بھی برقرار رکھا جائے گا۔
About the Author
