پشاور (سپورٹس رپورٹر) لاہور میں منعقد ہونے والی ساتویں نیشنل موئے تھائی چیمپئن شپ میں خیبر پختونخوا (کے پی) کے کھلاڑیوں نے غیر معمولی کارکردگی کا مظاہرہ کرتے ہوئے مجموعی طور پر ایک گولڈ، ایک سلور اور چار برانز میڈلز جیت کر صوبے کا نام روشن کر دیا۔
ملک بھر سے آئے ہوئے بہترین فائیٹرز کے درمیان سخت اور دلچسپ مقابلے دیکھنے میں آئے۔ خیبر پختونخوا کے کھلاڑیوں کی محنت اور صلاحیتوں کا نتیجہ واضح طور پر سامنے ایا. کھلاڑیوں میں گولڈ امین اللہ 81 کلوگرام, سلور ابوبکر 48 کلوگرام. برانز امین اللہ 60 کلوگرام. برانز ہدایت اللہ 63 کلوگرام. برانز نمرہ (خواتین) 48 کلوگرام. برانز بشری بی بی (خواتین) 54 کلوگرام.
صوبائی موئے تھائی ایسوسی ایشن کے جنرل سیکرٹری عنایت اللہ نے کھلاڑیوں کی اس کامیابی کو سراہتے ہوئے کہا کہ ڈائریکٹوریٹ آف اسپورٹس خیبر پختونخوا نے ہمیشہ ٹیلنٹیڈ کھلاڑیوں کی حوصلہ افزائی کی ہے۔ ہمیں فخر ہے کہ ہمارے کھلاڑیوں نے قومی سطح پر بہترین کارکردگی دکھا کر صوبے کا نام روشن کیا۔ ان کھلاڑیوں کی مزید تربیت اور حوصلہ افزائی کے لیے اقدامات جاری رہیں گے۔
انہوں نے مزید کہا کہ یہ کامیابیاں صوبائی سطح پر کھیلوں کے فروغ کے لیے ایک انتہائی مثبت پیش رفت ہیں۔
اختتام پر تمام کھلاڑیوں اور کوچنگ اسٹاف کو ان کی محنت اور کامیابی پر دل کی گہرائیوں سے مبارک باد پیش کی گئی اور یہ امید ظاہر کی گئی کہ یہ نوجوان مستقبل میں بین الاقوامی سطح پر بھی ملک و قوم کا نام روشن کرنے میں کامیاب ہوں گے۔
About the Author
