ملائیشیا کے شہر جوہر بارو میں کھیلے گئے 6 ملکی سلطان آف جوہر انٹرنیشنل ہاکی ٹورنامنٹ آسٹریلیا نے جیت لیا۔فائنل مقابلہ آسٹریلیا اور بھارت کے درمیان ہوا۔ جو سنسنی خیز مقابلے کے بعد آسٹریلیا کے نام رہاکھیل کے 13 ویں منٹ میں آسٹریلیا کے گروبیلار این نے پہلا گول داغ کر اپنی ٹیم کو برتری دلائی، تاہم بھارت کے ایکا انمول نے 17 ویں منٹ میں گول کرکے مقابلہ برابر کر دیا۔دوسرے ہاف میں دونوں ٹیمیں ایک دوسرے پر برتری حاصل کرنے کے لیے مخالف گول پوسٹ پر تابڑ توڑ حملے کرتی رہیں، لیکن کسی کو کامیابی نہ ملی۔تاہم آخری لمحات میں 59 ویں منٹ پر گروبیلار این نے دوسرا گول داغ کر ٹیم کو دو ایک کی برتری دلا دی اور بھارت کا کھیل کے اختتام تک مقابلہ برابر کرنے سے روکے رکھا۔ٹورنامنٹ کے دفاعی چیمپئن برطانیہ نے پاکستان کو 2-3 سے ہرا کر تیسری پوزیشن حاصل کی، پاکستان کی جانب سے کپتان حنان شاہد اور سفیان خان نے گول کئے۔برطانیہ کی جانب سے کیڈن،مائیکل اور ہینری نے گول سکور کئے۔پاکستان کے سفیان خان 9 گول کے ساتھ ٹورنامنٹ کے ٹاپ اسکورر قرار پائے۔ پانچویں پوزیشن کے میچ میں میزبان ملائیشیا نے نیوزی لینڈ کو 3-5 سے مات دی۔ چھ ملکی ٹورنامنٹ میں آسٹریلیا نے پہلی اور بھارت نے دوسری پوزیشن حاصل کی۔برطانیہ تیسرے،پاکستان چوتھے ،ملائیشیاء پانچویں اور نیوزی لینڈ چھٹے نمبر پر رہی۔
About the Author
