ہیپی ڈے سکول سسٹم پشاور کینٹ کے طالبعلم عزاز اختر کی شاندار کامیابی
پشاور (اسپورٹس رپورٹر) آل پاکستان نیشنل اسکولز سوئمنگ چیمپئن شپ میں ہیپی ڈے سکول سسٹم پشاور کینٹ کے ہونہار تیراک عزاز اختر نے شاندار کارکردگی کا مظاہرہ کرتے ہوئے ایک گولڈ اور دو سلور میڈل اپنے نام کر لیے۔
چیمپئن شپ میں ملک بھر کے نامور تعلیمی اداروں کے طلباء نے شرکت کی اور سخت مقابلوں کے بعد عزاز اختر نے اپنی بہترین تیراکی کی بدولت نہ صرف اپنے اسکول کا نام روشن کیا بلکہ پشاور اور خیبرپختونخوا کی نمائندگی کرتے ہوئے قومی سطح پر بھی اعزاز حاصل کیا۔
ہیپی ڈے سکول سسٹم کے پرنسپل، اساتذہ اور ساتھی طلباء نے عزاز اختر کی اس شاندار کامیابی پر خوشی کا اظہار کیا اور کہا کہ یہ کامیابی ان کی لگن، محنت اور کوچز کی انتھک تربیت کا نتیجہ ہے۔ اسکول انتظامیہ نے اس عزم کا اظہار کیا کہ وہ کھیلوں کے فروغ اور باصلاحیت طلباء کی حوصلہ افزائی کے لیے بھرپور کردار ادا کرتی رہے گی۔
اس موقع پر عزاز اختر نے کہا کہ ان کی یہ کامیابی والدین اور اساتذہ کی دعا اور رہنمائی کی بدولت ممکن ہوئی ہے، اور وہ مستقبل میں بھی مزید محنت کر کے قومی اور بین الاقوامی سطح پر پاکستان کا نام روشن کرنے کا عزم رکھتے ہیں۔
About the Author
