عاصم شیراز
پشاور: خیبر پختونخوا سپورٹس ڈائریکٹوریٹ ، ریجنل سپورٹس آفس پشاور اور ضلعی انتظامیہ کے زیر اہتمام معرکہ حق اور جشن آزادی کی مناسبت سے کھیلوں کے میلہ سجایا گیا جس میں گزشتہ روز پشاور اور چارسدہ کے درمیان کبڈی کا دلچسپ اور سنسنی خیز مقابلہ ہوا۔ قیوم اسٹیڈیم کے مرکزی گرائونڈ میں کھیلے جانے والے اس کانٹے دار مقابلے کو دیکھنے کے لئے پشاور اور چارسدہ سے ہزاروں کے تعداد میں شائقین پہنچے تھے۔ میچ کے مہمان خصوصی صوبائی وزیر کھیل سید فخر جہاںاو رڈپٹی کمشنر پشاور سرمد سلیم اکرم تھے
اس موقع انکے ہمراہ اے ڈی سی پشاور اصغر سورانی، ریجنل سپورٹس آفیسر کاشف فرحان، ڈپٹی ڈائریکٹر نعمت اللہ مروت، چیف کوچ شفقت اللہ، ایڈمنسٹریٹر پشاور سپورٹس کمپلیکس یوسف آفریدی سمیت اہم شخصیات موجود تھے۔ میچ سے قبل مہمان خصوصی نے کھلاڑیوں سے ملاقات کی۔ صوبائی وزیر کھیل سید فخر جہاں کا کہنا تھا جشن آزادی کے موقع پر کھیلوں کے مقابلوں کا بنیادی مقصد نوجوانوں کو مثبت سرگرمیوں کی طرف راغب کرنے کے ساتھ ساتھ انہیں اپنے اسلاف کی قربانیوں سے بھی آگاہ کرنا ہے۔ ان کا کہنا تھا کہ پاکستان بہت قربانیوں کے بعد حاصل ہوا ہے اور اب اس کی حفاظت اور تعمیر و ترقی نوجوانوں کی ذمہ داری ہے۔
ایک سوال کے جواب میں صوبائی وزیر کھیل سید فخر جہاں کا کہنا تھا کہ کبڈی ہمارا روایتی کھیل ہے آنے والے دنوں میں اس کھیل کے صوبائی اور قومی مقابلوں کا انعقاد بھی کیا جائے گا۔انہوں نے کہا کہ یوم آزادی کے سلسلے میں خیبرپختونخوا کے تمام ڈسٹرکٹس میں محکمہ کھیل خیبرپختونخوا کے زیر اہتمام مختلف تقریبات کا انعقاد کیاجارہا ہے ۔
یاد رہے پشاور اور چارسدہ کے درمیان کھیلے گئے کبڈی میچ میں سنسنی خیز اور کانٹے دار مقابلہ ہوا جس میں چارسدہ نے 33کے مقابلے میں 35پوائنٹس سے کامیابی حاصل کر لیے آخر میں مہمان خصوصی نے پشاور اور چارسدہ کی ٹیموں کے کپتانوں کو رنرزاپ اور فاتح ٹرافیاں دیں۔
About the Author
