حذیفہ ارشد نے انڈر-10 پاکستانی کراٹے کھلاڑی کی جنوبی ایشیائی چیمپئن شپ میں شاندار کامیابی
کولمبو: جنوبی ایشیائی کراٹے چیمپئن شپ کولمبو سری لنکا میں منعقد ہوئی جہاں پاکستان کے کم عمر لیکن باصلاحیت اور باہمت کھلاڑی حذیفہ ارشد نے انڈر 10 کیٹیگری میں انفرادی کاتا میں شاندار پرفارمنس دکھاتے ہوئے گولڈ میڈل جیتا اور قوم کا سرفخر سے بلند کردیا۔ چیمپئن شپ میں کامیابی کے بعد نہ صرف کوچنگ اسٹاف بلکہ قومی سطح پر بھی ارشد کو کافی پذیرائی ملی ہے۔ اور سوشل میڈیا پر بھی قوم نے کم عمر پاکستانی کھلاڑی کی بہت تعریف کی ہے۔اس فتح سے پاکستان میں کراٹے کھیل کو کافی پذیرائی ملے گی۔حذیفہ ارشد کی کامیابی کے بعد آئینہ نوئیل نے بہترین کھیل کا مظاہرہ کرتے ہوئے پاکستان کے لیے گولڈ میڈل جیت لیا آئینہ نوئیل نے انڈر 12 پلس 40 کے جی کلاس میں گولڈ میڈل جیتا۔اسی چیمپئن شپ میں ایک دن قبل پاکستان کی ابھرتی ہوئی خاتون کھلاڑی اریشہ ندیم نے انڈر 21 میں 50 کلوگرام سے کم وزن کیٹیگری میں سلور میڈل حاصل کیا جو خواتین کراٹے کے میدان میں پاکستان کے لیے ایک حوصلہ افزا علامت ہے۔حذیفہ ارشد کی یہ شاندار جیت پاکستان کے لیے مجموعی طور پر حاصل کردہ نو تمغوں میں اہم اضافہ ثابت ہوئی جن میں ایک طلائی، ایک چاندی اور سات کانسی کے تمغے شامل ہیں۔پاکستانی دستے کی اس کامیابی پر کھیلوں کے حلقوں، کوچزاور شائقین نے خوشی کا اظہار کیا اور حذیفہ ارشد کے عزم مہارت اور قومی پرچم کو بلند کرنے کے جذبے کو بھرپور خراج تحسین پیش کیا۔ان فتوحات کے بعد دو گولڈ، ایک سلور اور سات برانز کے ساتھ ٹورنامنٹ میں پاکستانی کھلاڑیوں کے حاسل کردہ میڈلز کی تعداد 10 ہوگئی ہے۔اس بین الاقوامی چیمپئن شپ میں جنوبی ایشیا کے چھ ممالک پاکستان، بھارت، سری لنکا، نیپال، بنگلہ دیش اور بھوٹان کے سینکڑوں کھلاڑیوں نے مختلف کیٹیگریز میں حصہ لیا۔بھارت 59 تمغوں (23 گولڈ) کے ساتھ اول رہا اسی طرح نیپال 50 تمغوں (21 گولڈ) کے ساتھ دوسرے جبکہ میزبان سری لنکا 59 تمغوں (16 گولڈ) کے ساتھ تیسرے نمبر پر رہااور بنگلہ دیش نے چوتھی پوزیشن حاصل کی جبکہ پاکستانی ٹیم نے مجموعی طور پر پانچویں پوزیشن حاصل کی۔پاکستان کراٹے فیڈریشن کے چیئرمین نے نوجوان کھلاڑیوں کی کارکردگی کو مستقبل کی امید قرار دیا اور کہا کہ اگر انہیں مسلسل تربیت بین الاقوامی ایکسپوژر اور سرکاری سرپرستی حاصل رہی تو پاکستانی کھلاڑی دنیا کے ہر کراٹے ایونٹ میں سبز ہلالی پرچم بلند کریں گے۔نوجوان کھلاڑیوں کی اس کامیابی کو کھیلوں سے وابستہ حلقے پاکستان کے مستقبل کے لیے خوش آئند قرار دے رہے ہیں جب کہ کوچز کا کہنا ہے کہ حزیفہ ارشد نے ملک کے لیے امید کی نئی کرن روشن کی ہے۔ذرائع کے مطابق پاکستان کی کراٹے ٹیم کی واپسی آئندہ ہفتے متوقع ہے جہاں ان کا استقبال سرکاری اعزاز اور شاندار طریقے سے کیا جائے گا۔
